சிலாபம் முன்னேஸ்வரத்திலுள்ள சிவன் கோவிலுக்கு இராஜகோபுரம் அமைப்பதற்கு எடுக்கப்படும் நடவடிக்கைகளுக்கு ஜாதிக ஹெல உறுமய கட்சி தடையாக இருப்பதாக தெரிவிக்கப்படுகிறது.
இராஜகோபுரம் அமைப்பதற்காக அனுமதி கேட்டு மாதம்பை பிரதேச செயலகத்திலே கடந்த மே மாதம் விண்ணப்பித்துள்ளதாகவும், ஆனால் இன்றுவரை அனுமதி வழங்கப்படவில்லை எனவும் அக்கோயிலின் தர்மகர்த்தாவும் தலைமைப் பூசாரியுமான பத்மநாப குருக்கள் குற்றம்சாட்டியுள்ளார்.
இது தொடர்பாக அவர் மேலும் குறிப்பிடுகையில்,
இராஜகோபுரம் அமைப்பதற்கான திட்டமிடலில் ஈடுபட்டபோது, அந்த இடத்தில் சந்தன வட்டக்கல் ஒன்று கிடைத்தது. இது பௌத்த மத சாயல் கொண்டுள்ளது என்று தொல்லியல் துறையினர் தெரிவித்துள்ளனர்.
அத்துடன் கோயில் வளாகத்தில் இருக்கின்ற அரச மரம் பௌத்தர்களுக்கு புனிதமான மரம் என்றும் அதனால் இராஜகோபுரத்துக்கான அஸ்திவாரத்தை அவ்விடத்தில் அமைக்க முடியாது என அப்பகுதியைச் சேர்ந்த பௌத்த பிக்குகள் திட்டவட்டமாகக் குறிப்பிட்டுள்ளனர்.
இராஜகோபுரத்துக்கான அஸ்திவாரப் பணிகள் நடந்த நிலையில், இது பௌத்த தொல்லியல் பகுதி என்று பிக்குமார் கூறிவருவது எமக்கு கவலையளிக்கின்றது.
ஹெல உறுமய கட்சியின் நாடாளுமன்ற உறுப்பினர் மேதானந்த தேரர் இந்தக் கோயில் பகுதிக்கு வந்து பார்த்துவிட்ட, இது பௌத்த புனித பிரதேசம் என்று பத்திரிகைகளுக்கு பேட்டியளித்துவருவது மேலும் வருத்தம் தருவதாகவுள்ளது.
நல்ல விநாயகர் ஆலயம் அமைந்திருந்த இடம் பிக்குமார் தங்கிய பிரதேசம் என்றும், செட்டிமார் மடம் பௌத்த ஆறாமைகள் என்றும் திருக்குளம் அமைந்திருக்கின்ற இடம் பௌத்த சைத்தியம் அமைந்திருந்த இடம் என்றும் அவர்கள் கருத்துக்களை வெளியிட்டுவருகின்றனர்.
பிரதேச சபையின் அனுமதி பெற்றுத்தான் கட்டிடம் கட்ட வேண்டும் என்ற நிலை பௌத்த ஆலயங்களுக்கு இல்லை என்றும் ஆனால் இந்து ஆலயங்களுக்கு அத்தகையதொரு இறுக்கமான நிலை காணப்படுவதாகவும் தலைமைப் பூசாரியுமான பத்மநாப குருக்கள் தெரிவித்தார்.
இராஜகோபுரம் பதினொரு தளங்களைக் கொண்டு அமையும் என்று தாங்கள் குறிப்பிட்டிருந்த நிலையில், மூன்று மாடிக் கட்டிடங்கள் வரைதான் பிரதேச சபை அனுமதியளிக்க முடியும், அதனினும் உயரமான கட்டிடங்களுக்கு மாகாண தலைமைப் பொறியியலாளரின் அனுமதி வேண்டும் என தமக்குத் தெரிவிக்கப்பட்டதாகவும் அவர் தெரிவித்தார்.
0 comments:
Post a Comment